لقاء أجراه القائد محمد سليم اللبابيدي
مدير عام الوكالة
اقام الفنان خالد الهبر عراب الاغنية الثورية حفله المعتاد في تياترو فردان وكان لوكالة الانباء الكشفية – كون شرف اللقاء معه والحديث الجانبي مع القائد اللبابيدي مدير عام الوكالة
القاب عديدة وكثيرة اطلقت على خالد الهبر ايهما الاحب الى قلبك؟ وهل النشأة والاسرة كان الها دور بخلق الفنان خالد الهبر؟
الحقيقة مش قصة القاب او غيرها الفكرة انو انا من بداية النشأة والانطلاقة تاعيتي اخدت على عاتقي والتزمت بهذا اللون من الغناء والقصيدة والنغم الثائر لانو انا تربية ببيت حمل هم القضية المجتمعية والنقابية والشعبية بمسؤولية فانا من اسرة شيوعية يسارية نقابية بامتياز وفي نفس الوقت كان الجانب الفنية عنا بالبيت اله مكانته واحترامه فعندما التزمت الخط الفني وهيدا النوع بالذات من الغناء والفن ما كان غريب على اسرتنا وعلى البيت بشكل عام
اليوم خالد الهبر بحفلات دائمة في تياترو فردان والحضور عبكون متنوع مش بس من اليسار حت المكان مش مثل الاماكن الي كنا نعتاد انو نشوف خالد الهبر فيها كيف بتشوف هاي الوضع؟
ما في اي فكرة نحن منغني وين منقدر كنا نعتاد على قصر الاونيسكو بس بسبب التأهيل الي عبيعمله ما في اي حفلات تقام فيه ولكن ان شاء الله بس يرجع يخلص هنرجع نغني عليه وقريبا كمان هيكون في حفلات في المركز الثقافي الروسي بالاضافة الى حفلاتنا الدائمة هون بالتياترو هون الجو لذيذ وحلو ودمه خفيف، اما بالنسبة لانو الجمهور مش بس من اليسار .. انا اليوم عبقدم اغنية من وجع وهموم الناس كل الناس مش بس اليساري كل الناس اليوم عندها هالهم وهالوجع الي نحن عمنحكي باغنيتنا فطبيعي ان يكونوا مبسوطين ومرتاحين لجونا ومن المتابعين لالنا
شو في جديد عند خالد؟
دائماً في جديد بيسعى الو الواحد بس المفروض انو يكون على مستوى المتابعين والمعجبين الي حبوك واحترموك ووثقوا فيك ما فيك تقدم اي شي لانو هنا معتمدين عليك بمحل معين انو انت صوتهم وهيدا مسؤولية كبيرة مش هينة، هلق نحن اليوم عمنحضر لا البوم جديد هينزل خلال شهرين او ثلاث اشهر باقصى حد هيضم تقريباً بحدود تسع او عشر اعمال وان شاء الله يكون عند حسن ظن العالم
فلسطين هي البلد الوحيد المحتل بالعالم بالالفية الثالثة
فلسطين والمواطن التعبان المعذب كانوا محور اغلب اغانيك اذا ما بدنا نقول كلها، ليش؟ وبعدك على هالفكرة بالاعمال الجديدة؟
اول شي اه اكيد كان وبعده محور اغنيتي لانو انا مثل ما قلتلك انا عبغني وجع العالم وهمومهم انا عبرفع الصوت الي بمحل من المحلات ما عبيقدر يرفعوا هنا، وفلسطين هي ارثنا الكبير من يوم ما خلقنا نحن بلبنان ونحن جيران مع فلسطين المحتلة وعينا على فكرة النضال والثورة على العدو الصهيوني وعلى كل هالتخبيص مرة بياخد شكل اقتصادي مرة باخد شكل قتالي مرة بياخد شكل فني المهم دائماً نحن بحالة مواجهة مع هالعدو واليوم قضية فلسطين هي قضيتنا المركزية لانو اليوم فلسطين هي البلد الوحيد المحتل بالعالم بالالفية الثالثة، ومن اعمالي الجديدة اكيد هم فلسطين معي في اغنية اليوم هنقدمها كمان ” لا تنسوا فلسطين ” وهتضل قضية فلسطين قضيتنا الاساس وما في نقاش او حكي او اي حل الا لترجع فلسطين
خالد فكرة تعمل فيديو كليب شي مرة لشي اغنية من اغنياتك؟
فيديو كليب صراحة مش كتير حسيتها بس انو ممكن اذا اندرس بطريقة فنية وحساسة لطيفة ومقبولة ومحترمة تخدم العمل نفسه من ناحية الكلام ومن ناحية اللحن ليش لا ما كتير غريبي بس انو الفكرة لازم تكون مدروسة مش هتجيب موديل مثلا ترقص وتغني بالكادر مش منطق واديش ممكن هيك كليب ياخد رواج هون السؤال
خالد انا كثير بتشكرك على هاللقاء الجميل معنا وان شاء الله النا لقاءات لاحقة / اهلاً وسهلاً فيكم والله يعطيكم العافية
من ناحية اخرى دائماً ما نسمع خالد الهبر والفرقة ولن تستغرب حينما تعرف انا مدير الفرقة هو ريان خالد الهبر نجل خالد فكان لنا حديث خاص معه
ريان يعطيك الف عافية .. خبرنا شوي عن العمل مع والدك هل في اي صعوبة بتلاقيها انت وعبتشتغل مع خالد كونه والدك؟
لا ابدا الفكرة هي بلشت انو انا اصلاً امتهنت هالمهنة التلحين والتوزيع وكان عندي شغلي بالبداية مع كتير من الفنانين منهم عباس شاهين وفايا يونان وغيرهم بعدان لما لقينا انو ممكن نعمل شي حلو انا وخالد اشتغلنا سوا وانا هلق صرلي فترة مستلم الفرقة معه وتقريباً اغلب اعماله بتكون تلحيني وتوزيعي او توزيعي وهو بلحن او حتى في بعض الاحيان انا بكتب شي بيعجبه يعني كله وارد
طريقة معاملتك مع خالد اثناء الشغل بتتاثر انو والدك او عادي؟
هلق طبعاً ببعض المواضع بتعمل شوية تأثر يعني احياناً بضيع بدي قله خالد او بابا بس لا بالشغل الفني ما في اي تأثر انا بقول الي عندي وهو بقول الي عنده
يعني ممكن تختلفوا على شي لحن مثلا؟
اكيد وبتصير دايماً اثناء العمل يعني بكون شغال على عمل معين، لا هيك مش راكب انا بقله لا هيك منيح منضل نتناقش ونزبط لنوصل للمستوى الي بيرضينا اثنيناتنا
شو جديد ريان ولا بس شغل مع خالد؟
لا في عندي شغلي الخاص مع العديد من الفنانين في هلق الالبوم تاع خالد عمنشتغل عليه وانا مستلم التوزيع كله مع فايا يونان وكمان في البوم جديد عمنحضرله وشغلي مع عباس كمان شغال
ريان يعطيك العافية والف شكر لوقتك الي عطيتنا ياه / اهلاً وسهلاً